Ժամանակակից արվեստի ինստիտուտը և ArtNexus-ը հայտարարում են «Ինչպես գոյատևել որպես սկսնակ արվեստագետ 3․0» ծրագրի երրորդ թողարկման դիմումների ընդունելությունը։

Ծրագիրը ինտենսիվ դասախոսությունների շարք է՝ ուղղված է երիտասարդ և սկսնակ արվեստագետների կարողությունների հզորացմանը։

Ծրագիրն իրականացվում է Շվեդիայի Արվեստի դրամաշնորհների կոմիտեի կողմից ֆինանսավորվող ArtNexus ծրագրի օժանդակությամբ։

Ծրագրի տևողությունը հինգ ամիս է․ 2025թ․ սեպտեմբերի սկզբից մինչև 2026թ հունվար։ Ծրագրին մասնակցությունը անվճար է։

Դիմելու վերջնաժամկետն է 2025թ․ հուլիսի 29-ը։

Ծրագրի մասին

Ծրագիրը ծնվել է երիտասարդ արվեստագետների՝ տարբեր առիթներով մեզ ուղղված հարցերից․

Ինչի՞ց սկսել
Ինչպե՞ս ստեղծել պորտֆոլիո
Ինչպե՞ս ինքնակրթվել
Ինչպե՞ս համագործակցել ցուցասրահների հետ
Ինչու՞ է պետք աշխատել համադրողի հետ 
Ինչպե՞ս մասնակցել միջազգային ցուցահանդեսների և արվեստի կացարանների ծրագրերի
Ինչպե՞ս ստանալ դրամաշնորհներ
Ինչպե՞ս ճանաչում ձեռք բերել

Եթե ձեզ նույնպես հուզում են այս հարցերը, ապա դիմե՛ք այս ծրագրին, որի ընթացքում դուք ավելի լավ կճանաչեք ձեզ և ձեր արվեստը, կսովորեք ձեզ ճիշտ ներկայացնել, կհղկեք ձեր պորտֆոլիոն և արվեստագետի դիրքավորումը (artist statement), կստեղծեք մասնագիտական ծանոթությունների ցանց և կիրականացնեք ավարտական նախագիծ՝ խմբային ցուցահանդես փորձառու համադրողի հետ (մասնակցությունը՝ մրցութային սկզբունքով), անհատական վարպետության դասեր կամ կեցություն ԺԱԻ՝ Վարդաբլուրի  արվեստի կացարանում։

Ինչո՞վ է առանձնանում այս ծրագիրը

Թեև այս ծրագրի շրջանակում մասնակիցները կստանան ցանկացած ստեղծարար ոլորտում կիրառելի գիտելիքներ, մենք հատկապես շեշտադրում ենք տեսողական (վիզուալ) արվեստի ոլորտը իր տարբեր հոսքերով և ենթաժանրերով։ Ուստի, ընտրության հարցում նախապատվությունը կտրվի վիզուալ արտիստներին։ 

Երկրորդ կարևոր հանգամանքը այն է, որ ծրագիրը լեցուն է և ընդգրկում է արվեստի աշխատանքի կազմակերպման, հաղորդակցության, մարքեթինգի, ինքնաներկայացման, արվեստի շուկայի թրենդերի և այլ գործընթացների վերաբերյալ դասընթացներ՝ միաժամանակ մեծ ուշադրություն հատկացնելով արվեստագետների, կուրատորների և արվեստի մենեջերների հետ համագործակցության և գործառույթների վերաբաշխման հմտություններին։

Ո՞վ կարող է դիմել

Ծրագրին կարող են դիմել մասնագիտական գործունեության վաղ շրջանում գտնվող 21-ից 35 տարեկան արվեստագետներ ՀՀ-ից։ Նախընտրությունը տրվում է  տեսողական (վիզուալ) արվեստագետներին։

Դասընթացի աշխատանքային լեզուն հայերենն է։ Միջազգային դասախոսությունների ընթացքում կտրամադրվի համաժամանակյա թարգմանություն։

Ի՞նչ ակնկալել ծրագրից

Դասընթացները կվարեն Հայաստանից և արտերկրից մի շարք անվանի մասնագետներ՝ արվեստի մենեջերներ, տեսաբաններ, համադրողներ և հարակից ոլորտների փորձագետներ։

Ծրագրի կարևոր գործնական նպատակներից է մասնակիցներին տրամադրել գիտելիքներ ստեղծագործ արտադրության բոլոր փուլերի մասին՝

• Արվեստագետի ինքնաճանաչում և իր ուղերձի ձևակերպում, 
• Ինքնաներկայացում և պորտֆոլիոյի կառուցում,
• Հաղորդակցություն և տեսանելիություն,
• Մասնագիտական ոլորտում դիրքավորում, 
• Համագործակցություն, մասնագիտական կապերի ստեղծում,
• Աշխատանք համադրողների և ցուցասրահների հետ,
• Միջազգային կապեր, դրամաշնորհներ և այլ հնարավորություններ։

Ծրագրի ավարտին դուք կունենաք ձեր ճանաչելի դիմագիծը իբրև արվեստագետ, գրագետ կազմված պորտֆոլիո, անհրաժեշտ գիտելիքներ արվեստի ոլորտի մարքեթինգի ասպարեզում, հաղորդակցության գործնական հմտություններ, բազում մասնագիտական կապեր և իրագործված ավարտական նախագիծ։

ՀՀ մարզերից ընտրված մասնակիցներին կտրամադրվի ճանապարհածախսը հոգալու կրթաթոշակ։

Մասնակիցները պետք է հաճախեն դասընթացների նվազագույնը 75%-ին ավարտական նախագծերում ընդգրկվելու և մասնակցության վկայական ստանալու համար։

Դիմելու համար լրացրեք այս հարցաշարը։

Հարցաշարին կցվող փաստաթղթերի ցանկը`

• Ինքնակենսագրական (ռեզյումե);
• Պորտֆոլիո (կարող է ներկայացվել նաև առցանց Behance, Dribble, Instagram կամ այլ համապատասխան հարթակներում): Պորտֆոլիո պատրաստելու համար կարող եք օգտվել պորտֆոլիո կառուցելու խորհուրդներից և պորտֆոլիո կառուցելու ձևանմուշից։

Ծրագրի մասնակիցներն ընտրվելու են այդ նպատակով ձևավորված Ընտրող հանձնաժողովի կողմից։ Ընտրված մասնակիցները կտեղեկացվեն արդյունքների մասին մինչև օգոստոսի 10-ը։

Լրացուցիչ հարցերի համար խնդրում ենք կապ հաստատել ծրագրի համակարգող Աշոտ Փափազյանի հետ icaevn.programs[@]gmail.com էլ․փոստի հասցեով կամ +374 98 96 67 52 հեռախոսահամարով։ 

Ծրագիրն իրականացվում է Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող ArtNexus ծրագրի օժանդակությամբ։

ԺԱԻ-ի մասին

Ժամանակակից արվեստի ինստիտուտը (ԺԱԻ) մշակութային հիմնադրամ է, որը խթանում է ժամանակակից արվեստի և քննադատական մտածողության զարգացումը և առաջխաղացումը Հայաստանում: Այն հիմնադրվել է 2013 թ-ին, և  գործում է որպես դինամիկ հարթակ ցուցահանդեսների, հետազոտությունների, կուրատորական և արվեստաբանական կրթության և համայնքային ծրագրերի համար: Տարբեր ծրագրերի միջոցով, այդ թվում Քննադատական և կուրատորական ուսումնասիրությունների դպրոցը, արվեստագետների կացարանները և տարածաշրջանային նախաձեռնությունները, ԺԱԻ-ն խթանում է երկխոսություն, փորձարարություն և համագործակցություն ինչպես տեղական, այնպես էլ միջազգային մակարդակներում՝ կարևոր դեր խաղալով Հայաստանի ժամանակակից արվեստի դաշտի ձևավորման գործում:

ArtNexus-ի մասին 

ArtNexus-ը Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող միջազգային ծրագիր է՝ ուղղված ստեղծագործական ազատությանը, մշակութային ոլորտի զարգացմանը և ժողովրդավարական գործընթացների ամրապնդմանը