«Ինչպես գոյատևել որպես սկսնակ արվեստագետ» ծրագիր

«Ինչպես գոյատևել որպես սկսնակ արվեստագետ» ծրագիրը ինտենսիվ դասախոսությունների շարք է՝ ուղղված է երիտասարդ և սկսնակ արվեստագետների կարողությունների հզորացմանը։ Ծրագիրն իրականացվում է Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող ArtNexus ծրագրի օժանդակությամբ։ Ծրագրին կարող են դիմել մասնագիտական գործունեության վաղ շրջանում գտնվող 21-ից 35 տարեկան արվեստագետներ ՀՀ-ից։

Ծրագիրը ծնվել է երիտասարդ արվեստագետների՝ տարբեր առիթներով մեզ ուղղված հարցերից․

• Ինչի՞ց սկսել
• Ինչպե՞ս ստեղծել պորտֆոլիո
• Ինչպե՞ս ինքնակրթվել
• Ինչպե՞ս համագործակցել ցուցասրահների հետ
• Ինչու՞ է պետք աշխատել համադրողի հետ 
• Ինչպե՞ս մասնակցել միջազգային ցուցահանդեսների և արվեստի կացարանների ծրագրերի
• Ինչպե՞ս ստանալ դրամաշնորհներ
• Ինչպե՞ս ճանաչում ձեռք բերել

Ծրագրի ընթացքում մասնակիցներին հնարավորություն է տրվում ավելի լավ ճանաչել ինքն իրենց  և իրենց արվեստը, սովորեք իրենց ճիշտ ներկայացնել, հղկել իրենց պորտֆոլիոն և արվեստագետի ասույթը (artist statement), ստեղծել մասնագիտական ծանոթությունների ցանց և իրականացնել ավարտական նախագիծ՝ խմբային ցուցահանդես փորձառու համադրողի հետ (մասնակցությունը՝ մրցութային սկզբունքով), անհատական վարպետության դասեր կամ կեցություն ԺԱԻ՝ Վարդաբլուրի  արվեստի կացարանում։

Ծրագիրը լեցուն է և ընդգրկում է արվեստի աշխատանքի կազմակերպման, հաղորդակցության, մարքեթինգի, ինքնաներկայացման, արվեստի շուկայի թրենդերի և այլ գործընթացների վերաբերյալ դասընթացներ՝ միաժամանակ մեծ ուշադրություն հատկացնելով արվեստագետների, կուրատորների և արվեստի մենեջերների հետ համագործակցության և գործառույթների վերաբաշխման հմտություններին։ Դասընթացները վարում են Հայաստանից և արտերկրից մի շարք անվանի մասնագետներ՝ արվեստի մենեջերներ, տեսաբաններ, համադրողներ և հարակից ոլորտների փորձագետներ։

Ծրագրի կարևոր գործնական նպատակներից է մասնակիցներին տրամադրել գիտելիքներ ստեղծագործ արտադրության բոլոր փուլերի մասին՝

• Արվեստագետի ինքնաճանաչում և իր ուղերձի ձևակերպում, 
• Ինքնաներկայացում և պորտֆոլիոյի կառուցում,
• Հաղորդակցություն և տեսանելիություն,
• Մասնագիտական ոլորտում դիրքավորում, 
• Համագործակցություն, մասնագիտական կապերի ստեղծում,
• Աշխատանք համադրողների և ցուցասրահների հետ,
• Միջազգային կապեր, դրամաշնորհներ և այլ հնարավորություններ։

Ծրագրի ավարտին մասնակիցները ունենում են իրենց ճանաչելի դիմագիծը իբրև արվեստագետ, գրագետ կազմված պորտֆոլիո, անհրաժեշտ գիտելիքներ արվեստի ոլորտի մարքեթինգի ասպարեզում, հաղորդակցության գործնական հմտություններ, բազում մասնագիտական կապեր և իրագործված ավարտական նախագիծ։