«Կատապուլտ տաղավար». շրջայց ԺԱԻ ցուցասրահով
Հարգելի արվեստասերներ և կոլեկցիոներներ,
Հրավիրում ենք ձեզ Կատապուլտ տաղավարի ԺԱԻ ցուցասրահ՝ մասնակցելու ցուցասրահի համադրող Լիլիթ Գրիգորյանի վարած շրջայցին։ Սա հնարավորություն է ընկղմվել այս ստեղծագործական լաբիրինթոսում՝ խորհելու նշանների և թաքնված իմաստների մասին: Մասնակիցները կծանոթանան արվեստի գործերի պատմությանը, կբացահայտեն արվեստագետների աշխարհը և կլսեն կուրատորական գործընթացի մասին:
«Կատապուլտ տաղավարը» ստեղծարար արդյունաբերության ամենամյա վաճառք-ցուցահանդես է, որի նպատակն է ցուցադրել հայկական արվեստի, ստեղծագործական տեխնոլոգիաների, դիզայնի, ճարտարապետության, նորաձևության, տպագրության և կատարողական արվեստների ոլորտների նմուշները և նախագծերը։ ԺԱԻ ցուցասրահում ներկայացված աշխատանքները ենթակա են վաճառքի:
Շրջայցը կմեկնարկի ապրիլի 8-ին, ժամը 14:00-ին, ՀայԱրտ մշակութային կենտրոնում: Սիրով ձեզ կսպասենք։
«Թելից դեպի հյուսվածք․ նյութի փոխակերպման ճանապարհը» նախագիծը ներկայացնում է չորս արվեստագետների աշխատանքներ՝ Արաքս Սահակյան, Արմինե Աթոյան, Մերի Բադալյան և Ալեքսեյ Մանուկյան։
Նախագծի համադրողն է Լիլիթ Գրիգորյանը, ղեկավարը՝ Նազարեթ Կարոյանը։
Ցուցադրությունը ուսումնասիրում է ժամանակակից արվեստի հարաբերությունը ավանդական տեխնիկաների հետ, ինչպիսիք են թելը, ասեղնագործությունը, գորգը։
Թելի կոնցեպտը ներկայացվող աշխատանքների մեջ դրսևորվում է տարբեր մեդիաներով՝ թղթի վրա արված գծից մինչև մետաղյա կոնստրուկտ, գեղանկարչական խառը տեխնիկա, ասեղնագործություն և գորգ։
Յուրաքանչյուր արվեստագետ արտահայտում է թելի գաղափարը տարբեր միջոցներով՝ գծապատկերից մինչև մետաղյա մալուխ, խառը մեդիայից մինչև ասեղնագործություն և գորգ։
Այն ուղին, որ թելը անցնում է հյուսվածք դառնալու ճանապարհին, համագործակցության մի պատում է, երբ տարբեր թելեր միասին ստեղծում են հյուսվածք, մի նոր պատմություն, որտեղ ամեն մասնիկը յուրահատուկ է, բայց և այսուհետ ընդհանուրի անքակտելի մասը։
Մյուս կողմից «Հավաքական հանճարի» գաղափարը այս աշխատանքներում դրսևովում է արվեստագետների՝ համայնքի մաս լինելու, համայնքի վրա հենվելու, վերցնելու և տալու ունակության մեջ․ նյութի, գաղափարի, հմտությունների, ավանդույթի ընդհանուր միջավայրում գտնվելու հետևանքով։